The blude-red rose at Yule may blaw,
The summer lilies bloome in snaw,
The frost may freeze the deepest sea;
But an auld man shall never daunton me!
To daunton me, and me sae young,
Wi' his fause heart and flatterin' tongue!
That is the thing ye ne'er shall see;
For an auld man shall never daunton me.
For a' his meal, for a' his maut,
For a' his fresh beef and his saut,
For a' his gowd and white monie,
An auld man shall never daunton me.
His gear may buy him kye and yowes,
His gear may buy him glens and knowes;
But me he shall not buy nor fee;
For an auld man shall never daunton me.
He hirples twa-fauld, as he dow,
Wi' his teethless gab and auld bauld pow,
And the rain rins doun frae his red-blear'd e'e:
That auld man shall never daunton me.
Comments